दुई शब्द !!

दुई शब्दले मरिसकेको आत्मालाई बचाउँछ । 
दुई शब्दले नै छातीभित्र तिखो छुरा धसाउँछ । 

छुटी सकेका हातहरू, टुटी सकेका साथहरू,
दुई शब्द न्यानोले खस्किएको सम्बन्ध कसाउँछ । 

दुखेको मन, थाकेको बदन अनि रोइरहेका नयन,
दुई शब्दले आँसुमा रुझेका आँखाहरू हँसाउँछ । 

बाचा कसमका सुन्दर सुन्दर मालाहरू गाँसेँ पनि,
दुई शब्दले मुक्ति दिन्छ र दुई शब्दले फसाउँछ । 

बाहिरी आवरण जतिसुकै राम्रो होस या कुरूप, 
दुई शब्दले उसको नियत गन्हाउँछ या बसाउँछ । 

कसैको तितो दुई शब्द प्रहारले मरिसकेका सपना, 
अर्कोको मिठो दुई शब्दले, सपना फेरी जगाउँछ । 

हासों खुसी, प्रेम र घृणा बस दुई शब्दको खेल,
दुई शब्दले चैन दिन्छ, दुई शब्दले चैन भगाउँछ ।